Narón, 22 de abril de 2016. Un total de 220 persoas inscribíronse nas últimas semanas na nova andaina do programa “Ponte en ruta con nós”, organizado polo Concello de Narón, a través da área de Deportes, e a empresa Arasti Barca. “Polos camiños milenarios do Val” é o título desta nova ruta, duns dezaseis quilómetros e que terá lugar este domingo, día 24. Os participantes percorrerán diferentes lugares da parroquia naronesa do Val e deberán estar o domingo ás 9.15 horas no pavillón polideportivo da Gándara, tal e como recordan desde a organización. Nun momento do tramo realizarán, como é habitual, unha parada para un avituallamento. Os organizadores anuncian un cambio de data para a seguinte convocatoria debido a motivos organizativos. A andaina “Coñecemos Narón” será o domingo 29 de maio, e non o 22 do citado mes, tal e como estaba previsto inicialmente. As persoas interesadas en anotarse á próxima camiñata poderán facelo a partir do vindeiro 2 de maio, en horario de 9.00 a 13.00 e de 16.30 a 18.30 de luns a xoves ou os venres de 9.00 a 13.00 horas. Terán que abonar unha cuota de tres euros, coa que se pagará o desprazamento en autobús ata o punto de inicio e de regreso ao pavillón polideportivo da Gándara. As prazas cubriranse por rigorosa orde de inscrición.