Novas
 
ALGO MÁIS DE MEDIO CENTENAR DE PERSOAS PARTICIPARÁN NO "X CAMPIONATO DE TENIS DE MESA POLA SAÚDE MENTAL"
A asociación Saúde Mental Ferrol, Eume e Ortegal organiza a convocatoria, na que colaboran o Concello de Narón, o club Tenis de Mesa Narón e Feafes Galicia
Narón, 19 de setembro de 2019. Os concelleiros de Deportes, José Oreona, e Benestar Social, Catalina García, presentaron esta mañá con Félix Pena e Paula Díaz, presidente e terapeuta ocupacional, respectivamente da asociación Saúde Mental Ferrol, Eume e Ortegal, e co presidente do Club Narón Tenis de Mesa, Fernando Montero, a décima edición do “Campionato de Tenis de mesa pola saúde mental”. O evento, organizado pola asociación Saúde Mental Ferrol, Eume e Ortegal en colaboración coa Federación Saude Mental Feafes Galicia, o Concello e o clube Narón Tenis de Mesa, terá lugar o vindeiro venres, día 20 no pavillón Campo da Serra a partir das 9.30 horas. No campionato participarán 58 persoas procedentes de oito asociacións de toda Galicia e entre os seus obxectivos están o de “promover a actividade física entre as persoas con problemas de saúde mental e fomentar a práctica de ocio normalizado”.
Os participantes proveñen de asociacións e delegacións de Saúde Mental Feafes Galicia: Alba (Pontevedra), Alume (Lugo), Andaina (Dodro e Ordes), Apem (Cee), Avelaíña (A Guarda), Doa (Vigo e Cangas), Saúde Mental Feafes Galicia (Vigo), e Saúde Mental Ferrol, Eume e Ortegal (Narón). Ao longo de toda a mañá, ata as 14.00 horas aproximadamente, os participantes xogarán partidos individuais e ao remate do mesmo haberá un xantar de convivencia.
A través deste evento apóstase tamén por “promover o deporte en igualdade, impulsar a actividade física entre as persoas con problemas de saúde mental e loitar contra o estigma social que sofre o colectivo”, tal e como indicou Félix Pena. Mediante actividades como a que se desenvolverá este sábado na cidade, Saúde Mental Ferrol, Eume e Ortegal “amosa á sociedade a imaxe máis positiva da saúde mental, combatindo de modo activo os estereotipos negativos e os falsos prexuízos que se asocian a esta realidade”, explicou. Así mesmo, dende a organización incidiron tamén en que as actividades de ocio e deporte que organizan “axudan a mellorar a calidade de vida das persoas con problemas de saúde mental e das súas familias, ao romper os participantes coa súa rutina diaria, realizar actividade física dende unha perspectiva lúdica, socializarse e integrarse na sociedade, ao tempo que dan un respiro aos seus familiares na súa tarefa de coidadores”.
Pena agradeceu a colaboración do Concello de Narón e destacou a importancia de diversificar as actividades que se desenvolven dende a entidade. Pola súa parte, o presidente do Club Tenis de Mesa Narón recordou que este é o terceiro ano consecutivo que colaboramos neste campionato e facémolo con moita ilusión porque é unha gran oportunidade para vivir a pureza do deporte por riba dos resultados”.
O concelleiro de Deportes naronés asegurou que dende o Concello “estamos moi orgullosos de que contárades con nós para colaborar neste evento” e amosou o “apoio a este tipo de iniciativas”, ao tempo que valorou tamén a colaboración prestada polo Club Tenis de Mesa Narón.
Así mesmo, a concelleira de Benestar Social animou á asociación naronesa a continuar impulsando este tipo de eventos deportivos na cidade. “É unha forma de integrarse, non só de facer exercicio, senón tamén de tratar de que a sociedade nos vexa a todos como persoas, coas nosas diversidades, e buscando o trato de igual a igual”. García e Oreona convidaron á cidadanía a acudir a esta cita deportiva o vindeiro venres, día 20.



Últimas noticias
O CONCELLO PRESENTOU UN NOVO CLUB DE PESCA DA CIDADE, O "ESPIÑAZO NARÓN FISHING"
O CONCELLO COLABORA COA ANPA "ACIBRO" DO COLEXIO JORGE JUAN NA "I CARREIRA-ANDAINA CORAZÓN ACIBRO"
O CONCELLO RETOMARÁ ESTE MES O PROGRAMA MUNICIPAL "PONTE EN RUTA CON NÓS" CUNHA ANDAINA CIRCULAR POLO TERMO MUNICIPAL NARONÉS
A ALCALDESA E O EDIL DE DEPORTES PARTICIPARON NO ACTO DE ENTREGA DE TROFEOS DA TERCEIRA FASE DA COPA DE ESPAÑA DE XIMNASIA ESTÉTICA
A ALCALDESA ASINOU CONVENIOS CON ENTIDADES DEPORTIVAS DA CIDADE POR UN IMPORTE CONXUNTO DE 196.000 EUROS

Destacados

Outras webs municipais

   
 
Concello de Narón - Aviso legal