Narón, 10 de xullo de 2020. Os clubs e entidades deportivas interesados en utilizar na tempada 2020-2021 as instalacións deportivas municipais (pistas de pavillóns, campos de fútbol, ximnasio do Complexo polideportivo da Gándara…) deberán presentar as solicitudes de uso a partir do vindeiro luns, día 13, e ata o 7 de agosto. Así o anunciou o concelleiro de Deportes, José Oreona, que recordou que o modelo a presentar se pode descargar da páxina web do Padroado de Deportes, a través do enlace: http://www.padroadodeportesnaron.com/web/docs/modelo-solicitud-instalacions-deportivas-modif.pdf. Este modelo, unha vez cumplimentado, deberá acompañarse dunha solicitude xenérica e presentalo no Rexistro Municipal do Concello ou a través da Sede Electrónica do Concello de Narón. O edil naronés indicou que é preciso presentar unha solicitude de uso por cada unha das instalacións municipais que se pretendan utilizar, no caso de que sexan máis dunha. Oreona recalcou que para entregar a documentación a través do Rexistro do Concello é preciso concertar unha cita previamente, chamando ao número de teléfono 981 111 025 (extensión 3).